ಬೆಂಗಳೂರು: ಜನಪ್ರಿಯ ನಟ **ಕೃಷ್ಣ ಅಜೇಯ್ ರಾವ್** ಮುಖ್ಯ ಪಾತ್ರದಲ್ಲಿ ಅಭಿನಯಿಸಿರುವ **‘ರಾಧೇಯ’** ಚಿತ್ರವು ಇದೇ ಶುಕ್ರವಾರ (**21-11-2025**) ರಾಜ್ಯಾದ್ಯಂತ ಭವ್ಯವಾಗಿ ತೆರೆ ಕಾಣಲು ಸಿದ್ಧವಾಗಿದೆ. ಹಲವು ಖ್ಯಾತ ನಿರ್ದೇಶಕರೊಂದಿಗೆ ಕೆಲಸ ಮಾಡಿ ಅನುಭವ ಗಳಿಸಿರುವ **ವೇದಗುರು**, ಈ ಚಿತ್ರದಿಂದ ಮೊದಲ ಬಾರಿಗೆ ನಿರ್ದೇಶಕನಾಗಿ ಪಾದಾರ್ಪಣೆ ಮಾಡಿದ್ದಾರೆ. ಕೀರ್ತಿ ಚಾಹ್ನಾ ಸಿನಿಮಾ ಕಾರ್ಖಾನೆಯ ಅಡಿಯಲ್ಲಿ ವೇದಗುರು ಅವರೇ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ.
ಚಿತ್ರದಲ್ಲಿ **ಸೋನಾಲ್ ಮಂತೆರೋ** ನಾಯಕಿಯಾಗಿ ನಟಿಸಿದ್ದು, ಮಹಾಭಾರತದ ಕರ್ಣನಿಗೆ ಹೊಂದಿಕೊಂಡಂತೆ ‘ರಾಧೇಯ’ ಎಂಬ ಶೀರ್ಷಿಕೆಯನ್ನು ಆಯ್ಕೆ ಮಾಡಲಾಗಿದೆ. ಕರ್ಣನ ಸಾಕು ತಾಯಿ ರಾಧಾ ಅವರ ಹೆಸರಿನಿಂದ ಬಂದ ‘ರಾಧೇಯ’ ಎಂಬ ಹೆಸರು, ನಾಯಕನ ಪಾತ್ರದಲ್ಲಿರುವ ತ್ಯಾಗ ಮತ್ತು ಮೌಲ್ಯಗಳಿಗೆ ಹೊಂದಿಕೊಳ್ಳುತ್ತದೆ ಎಂದು ಚಿತ್ರತಂಡ ತಿಳಿಸಿದೆ.
ಲವ್ ಜಾನರ್ ಕಥೆ ಇದ್ದರೂ, ಸಾಮಾನ್ಯ ಮಾದರಿಯಿಂದ ಭಿನ್ನವಾಗಿ ಕಟ್ಟಿಕೊಡಲು ನಿರ್ದೇಶಕರು ವಿಶೇಷ ಪ್ರಯತ್ನ ಮಾಡಿದ್ದಾರೆ. ಪ್ರೀತಿಯನ್ನು ಉಳಿಸಿಕೊಳ್ಳಲು ನಾಯಕ ರಾಧೇಯ ಎದುರಿಸುವ ಅಡ್ಡಿ–ಆತಂಕಗಳು ಮತ್ತು ಅವುಗಳನ್ನು ಗೆದ್ದು ಹೊರಬರುವ ಹಾದಿಯೇ ಚಿತ್ರದ ಮುಖ್ಯ ಕಥಾವಸ್ತು. ಜೈಲಿನಲ್ಲಿರುವ ವ್ಯಕ್ತಿಯೊಬ್ಬನ ಪಾತ್ರದ ಸುತ್ತ ಕಥೆ ಸಾಗುತ್ತದೆ. ಚಿತ್ರದ ಬಹುತೇಕ ಶೂಟಿಂಗ್ ಬೆಂಗಳೂರು ಮತ್ತು ಸುತ್ತಮುತ್ತ ಪ್ರದೇಶಗಳಲ್ಲಿ ಮುಗಿಸಲಾಗಿದೆ.
ಸೋನಾಲ್ ಮಾಂಟೆರೋ ಅವರು ಲೋಕಲ್ ಚಾನೆಲ್‌ನ ಕ್ರೈಮ್ ರಿಪೋರ್ಟರ್ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ಚಿತ್ರಕ್ಕೆ **ವಿಯಾನ್ (ಸ್ಯಾಂಡಿ)** ಅವರ ಸಂಗೀತ, **ರಮ್ಮಿ** ಅವರ ಛಾಯಾಗ್ರಹಣ ಮತ್ತು **ಸುರೇಶ್ ಆರ್ಮುಗಂ** ಅವರ ಸಂಕಲನ ಬಲ ನೀಡಿದ್ದು, ಫಾರೆಸ್ಟ್ ನಿರ್ಮಾಪಕ **ಕಾಂತರಾಜು** ಚಿತ್ರವನ್ನು ಬಿಡುಗಡೆ ಮಾಡುತ್ತಿದ್ದಾರೆ.
ಚಿತ್ರ ಈಗಾಗಲೇ ಹಲವು ವಲಯಗಳಲ್ಲಿ ಕುತೂಹಲ ಹುಟ್ಟುಹಾಕಿದೆ. **ನವೆಂಬರ್ 21ರಿಂದ ಸಿನಿಮಾ ಮಂದಿರಗಳಲ್ಲಿ 'ರಾಧೇಯ' ಪ್ರದರ್ಶನ.**